बाँकेको बैजनाथ गाउँपालिका, ६ मा आईतवार राती एक घरमा चोरी भएको आशंका गरिएको छ ।
स्थानीय ममता नेपालीको घरमा आईतवार राती सुनचाँदी र केही नगद चोरी भएको खबर आएको ईलाका प्रहरी कार्यालय कोहलपुरका प्रमुख प्रहरी नायब उपरीक्षक रबिन्द्र खनालले जानकारी दिए ।
‘घटनाबारे थाहा पाउँनेवित्तिकै प्रहरी घरमा पुगेर जानकारी लिएको थियो’ उनले भने, ‘हामीले घटनालाई गम्भीर रुपमा लिदैं तालिमप्राप्त कुकुरको समेत अनुसन्धानमा प्रयोग गरेका थियौं ।’
नेपाल प्रहरीको कोहलपुरमा रहेको कुकुर शाखाबाट लगिएको तालिमप्राप्त ‘जम्बो’ नामको कुकुर चोरी भएको घरबाट तीन किलोमिटर टाढाको एक सरकारी स्कुलमा गएर रोकिएको थियो ।
ठूलो परिमाणको सुन र नगद लुटपाट भएको खबर पाएलगत्तै जिल्ला प्रहरी कार्यालय बाँकेका प्र्रमुख प्रहरी उपरीक्षक श्याम कृष्ण अधिकारी, कोहलपुर प्रहरी प्रमुख प्रहरी नायब उपरीक्षक खनाल, विभिन्न युनिटबाट प्रहरी निरीक्षक तथा प्रहरी नायब निरीक्षकका छुट्टाछुट्टै टोली परिचालन भएका थिए ।
चोरी भयो भनिएका अधिकांश सुनका गरगहना घरमा नै खानतलासीको बेला भेटिएको प्रहरी नायब उपरीक्षक खनालले बताए ।
‘घर धनीले सुरुमा प्रहरीलाई चोरी भयो भनिएका अधिकांश गरगहना घरमा नै भेटिएका छौं’ उनले भने, ‘हामीले घटनाबारे अनुसन्धान अगाडी बढाइसकेका छौं । चोरी नै भएको पुष्टि भए । चोरीमा संग्लनहरु पक्राउ पर्छन् ।’
अनुसन्धानमा खटिएको प्रहरी टोलीले केहीलाई पक्राउ गरेर अनुसन्धान अगाडि बढाइराखेको छ । प्रहरी स्रोतका अनुसार घटनाको अनुसन्धानको लागि प्रहरीका तीन छुट्टाछुट्टै टोली परिचालन भएका छन् ।
चोरी भएको भनिएपनि घरबाटै बरामद भएका गरगहना
१. छड्के तिलहरीः १ वटा
२. माईली तिलहरीः ५ वटा
३. सानो तिलहरीः ४ वटा
४. मंगलसुत्रः १ वटा
५. वालीः ४ जोडी
६. झालाः १ जोडी
७. औंठी सानोः १ वटा
८. खुकुरी टपः १ जोडी
९. जुलीः २ जोडी
१०. फुलीः १ वटा
Blogger Comment
Facebook Comment